આ સમસ્યાને દૂર કરવા માટે જેટિંગ મશીન દ્વારા ગટર લાઈનની સફાઈ કામગીરી શરૂ કરાઈ: પાણી પુરવઠા વિભાગના અધિકારી
મોરબી: મોરબીમાં આવેલી અનેક સરકારી કચેરીઓનું કેન્દ્ર એવા લાલબાગ સેવા સદનનાં મુખ્ય ગેટ પાસે ગટરના ગંદા પાણી ભરાવવાથી અરજદારો અને મુલાકાતીઓને ભારે હાલાકીનો સામનો કરવો પડી રહ્યો છે. આ સેવા સદન સંકુલમાં કોર્ટ, તાલુકા સેવા સદન, મામલતદાર કચેરી, અને ડેપ્યુટી કલેક્ટર કચેરી જેવી મહત્વપૂર્ણ કચેરીઓ સહિતની કચેરીઓ આવેલી છે, જેથી દરરોજ હજારોની સંખ્યામાં લોકો અહીં આવતા-જતા હોય છે.
ગેટની બહાર જ ગંદા પાણી ભરાવાને કારણે લોકોને તેમાંથી પસાર થવું પડે છે, જેનાથી સ્વચ્છતા અને આરોગ્ય સંબંધિત સમસ્યાઓ ઊભી થઈ રહી છે. આ મામલે, પાણી પુરવઠા વિભાગના અધિકારી પિયુષ મકવાણાએ જણાવ્યું કે આજે સવારથી ગટર ઉભરાવાની સમસ્યા હતી. આ સમસ્યાને દૂર કરવા માટે જેટિંગ મશીન દ્વારા ગટર લાઈનની સફાઈ કામગીરી શરૂ કરી દેવામાં આવી છે.
