મોરબી : શહેરની સફાઈ કરવામાં જે રાત દિવસ જોયા વગર પોતાની જાતને ઘસી નાખે છે એ સફાઈ કર્મચારીઓ ખરેખર કર્મયોગી હોય તેમનું જેટલું મૂલ્ય આકીએ એટલું ઓછું ગણાય એવી સદભાવના વ્યક્ત કરવા ક્રાંતિકારી વિચારોને વરેલા મોરબીના અનેકવિધ વિવિધ કાર્યો કરી દેશભાવના જાગૃત કરતા યંગ ઇન્ડિયા ગ્રુપના સંસ્થાપક ડો. દેવેનભાઈ રબારીએ સફાઈ કર્મયોગીઓનું મુઠી ઉંચેરું સન્માન કર્યું હતું. સાથેસાથે તેઓએ સફાઈ કર્મીઓની અનન્ય સેવા શ્રેષ્ઠ ગણીને બિરદાવી હતી.
યંગ ઇન્ડિયા ગ્રુપના સંસ્થાપક શ્રી ડો.દેવેન રબારીએ દિવાળીની પવિત્ર રાત્રે શહેરના સફાઈ કર્મયોગીઓની અમૂલ્ય સેવાને બિરદાવવા, તેમના પ્રત્યે કૃતજ્ઞતા વ્યક્ત કરવા ભેટ-સોગાદનું વિતરણ કર્યું હતું અને તેમના આશીર્વાદ મેળવ્યા હતા. આ ભેટ-સોગાદ એક નિમિત્ત હતું, જેના દ્વારા ગ્રુપે સફાઈ કર્મચારીઓના સમર્પણ અને મહેનતનું હૃદયપૂર્વક સન્માન કર્યું હતું જે યંગ ઇન્ડિયા ગ્રુપની ‘સર્વ જન હિતાય, સર્વ જન સુખાય’ની વિચારધારાને પ્રતિબિંબિત કરે છે.
દિવાળીની રાત્રે, જ્યારે શહેર દીવડાઓના ઉજાસ અને ઉત્સાહમાં ઝળહળે છે, ત્યારે સફાઈ કર્મયોગીઓ શાંતિપૂર્વક પોતાની ફરજ નિભાવી શહેરને સ્વચ્છ અને સુંદર રાખે છે. આવા અદૃશ્ય હીરોની સેવાને યાદ કરી, દેવેન રબારીએ તેમને વ્યક્તિગત રીતે મળી, તેમની મહેનતનો આભાર માન્યો, નવા વર્ષની શુભેચ્છાઓ પાઠવી અને ભેટ-સોગાદ આપી. આ ભાવસભર ક્ષણોમાં કર્મચારીઓએ હૃદયથી આશીર્વાદ આપ્યા, જે ગ્રુપ માટે અમૂલ્ય છે.
ડો.દેવેન રબારીએ જણાવ્યું, “આ ભેટ-સોગાદ માત્ર એક પ્રતીક છે, જે સફાઈ કર્મયોગીઓની નિઃસ્વાર્થ સેવા પ્રત્યેની અમારી કદર દર્શાવે છે. તેમના આશીર્વાદ અમને સમાજસેવાના માર્ગે વધુ નિષ્ઠાથી આગળ વધવા પ્રેરે છે.” સફાઈ કર્મચારીઓએ આ પહેલની પ્રશંસા કરતાં કહ્યું, “અમારા જેવા સામાન્ય કામદારોનું આવું સન્માન થાય એ અમારા માટે ગૌરવની વાત છે. આવા પ્રયાસો અમને વધુ ઉત્સાહથી કામ કરવા પ્રોત્સાહિત કરે છે.” યંગ ઇન્ડિયા ગ્રુપની આ પહેલ યુવા પેઢીને સંદેશ આપે છે કે, સમાજના દરેક વર્ગની સેવાને મૂલવવી અને તેમના યોગદાનને યાદ કરવું એ સાચી સમાજસેવા અને રાષ્ટ્રભક્તિ છે.
