મોરબી: પ્રજાસત્તાક પર્વ ૨૬ જાન્યુઆરી, ૨૦૨૬ નિમિત્તે પ્રતિવર્ષની જેમ આ વર્ષે પણ નવી દિલ્હીના ‘કર્તવ્ય પથ’ ઉપર ભવ્ય અને રંગારંગ પરેડનું આયોજન કરવામાં આવ્યું હતું. આ પરેડ દરમિયાન દેશની ત્રણે સશસ્ત્ર સેના, સાંસ્કૃતિક ઝાંખીઓ તથા વિવિધ રાજ્યોના આકર્ષક ટેબ્લોનું પ્રદર્શન કરવામાં આવ્યું હતું.
૨૬ જાન્યુઆરીના રોજ ગુજરાત રાજ્ય દ્વારા “સ્વતંત્રતા કા મંત્ર : વંદે માતરમ્” વિષય આધારિત ટેબ્લો પ્રદર્શિત કરવામાં આવ્યો હતો, જેને વ્યાપક જનસમર્થન મળ્યું છે. ગતવર્ષની જેમ આ વર્ષે પણ ગુજરાતના ટેબ્લોને વિજેતા બનાવવા જનતાને ભરપૂર વોટિંગ કરવાની અપીલ કરવામાં આવી છે.
આ માટે ભારત સરકારના MyGov પોર્ટલ પર ઓનલાઈન વોટિંગ યોજાયું છે. નાગરિકોને અપીલ કરવામાં આવી છે કે તેઓ આ વોટિંગ લિંક પોતાના મિત્રો, પરિચિતો, યુવાઓ, સમાજના સભ્યો તેમજ કચેરીના કર્મચારીઓ સુધી વ્યાપક પ્રમાણમાં શેર કરી તેમને પણ ગુજરાતના ટેબ્લોને મત આપવા પ્રોત્સાહિત કરે.
વોટિંગ માટે નાગરિકોને www.mygov.in/node/365980/ લિંક પર જઈ રાજ્યોના ટેબ્લોની યાદીમાં બીજા ક્રમાંકે દર્શાવાયેલા ગુજરાતના ટેબ્લો સામે ટીક કરીને, ‘Log in to Participate’ વિકલ્પ પસંદ કરી મોબાઈલ નંબર અથવા ઈ-મેલ આઈડી દાખલ કરવાનું રહેશે. બાદમાં મળતો OTP દાખલ કરતા જ મત નોંધાઈ જશે.
ઉલ્લેખનીય છે કે આ વોટિંગ લિંક ૨૬ જાન્યુઆરી, ૨૦૨૬ના રોજ રાત્રે ૧૧:૪૫ વાગ્યા સુધી ખુલ્લી રહેશે. તેથી વધુમાં વધુ નાગરિકો દ્વારા વોટિંગ કરી ગુજરાતના ટેબ્લોને વિજેતા બનાવવા સહયોગ આપવા અપીલ કરવામાં આવી છે.
