ગાંધીનગર સ્થિત હેલિપેડ એક્ઝિબિશન સેન્ટર ખાતે આજે Indian Ceramics Asia 2026 ના 20મા એડિશનનું ભવ્ય ઉદ્ઘાટન કરવામાં આવ્યું. ત્રણ દિવસીય આ આંતરરાષ્ટ્રીય B2B ટ્રેડ ફેરમાં ભારતના સીરામિક ઉદ્યોગની બદલાતી દિશા સ્પષ્ટ રીતે દેખાઈ રહી છે, જ્યાં હવે ઝડપી વિસ્તરણ કરતાં વધુ ઉત્પાદન કાર્યક્ષમતા, ખર્ચ નિયંત્રણ અને નવી ટેકનોલોજીના વ્યાવહારિક અમલીકરણ પર ભાર મૂકવામાં આવી રહ્યો છે.
મેસે મૂંચેન ઈન્ડિયા અને યુનિફેર એક્ઝિબિશન્સ સર્વિસ કો. લિ. દ્વારા સંયુક્ત રીતે આયોજિત આ પ્રદર્શનમાં 300થી વધુ અગ્રણી દેશી-વિદેશી બ્રાન્ડ્સ ભાગ લઈ રહી છે. પ્રદર્શનમાં સીરામિક રો મટીરીઅલ્સ, આધુનિક મશીનરી, પ્રોસેસિંગ ઇક્વિપમેન્ટ તથા અદ્યતન ટેકનોલોજીઓ રજૂ કરવામાં આવી છે. હાલ ઉદ્યોગમાં ઊર્જા ખર્ચ ઘટાડવો, ઉત્પાદન સ્થિરતા જાળવવી અને ગુણવત્તામાં સતત સુધારો લાવવો મુખ્ય ચર્ચાનો વિષય બન્યો છે. આ ટ્રેડ ફેરમાં આંતરરાષ્ટ્રીય ભાગીદારી પણ નોંધપાત્ર રહી છે. બેલ્જિયમ, બલ્ગેરિયા, ચીન, જર્મની, ઇટાલી, જાપાન, પોર્ટુગલ અને સ્લોવેનિયા સહિત કુલ આઠ દેશોના પ્રદર્શકો હાજર છે. ખાસ કરીને જર્મની અને ઇટાલી દ્વારા રજૂ કરાયેલા પેવિલિયન્સ યુરોપિયન ટેકનોલોજી સપ્લાયર્સનો ભારતીય બજાર પ્રત્યેનો વધતો વિશ્વાસ દર્શાવે છે.
મેસે મૂંચેન IMEA ના પ્રેસિડેન્ટ તથા મેસે મૂંચેન ઈન્ડિયાના CEO ભૂપિંદર સિંહે જણાવ્યું હતું કે, “સીરામિક ઉદ્યોગ હવે વધુ શિસ્તબદ્ધ ખરીદીના તબક્કામાં પ્રવેશી ગયો છે. ઉત્પાદકો એવી ટેકનોલોજી અપનાવવા માંગે છે જે ઊર્જા ખર્ચ અને ઉત્પાદન કાર્યક્ષમતા પર સ્પષ્ટ અને માપી શકાય તેવો લાભ આપે.”
મોરબી સીરામિક એસોસિએશન (વોલ ટાઇલ્સ ડિવિઝન) ના પ્રેસિડેન્ટ હરેશભાઈ રામજીભાઈ બોપલિયાએ કહ્યું હતું કે,
“મોરબીની MSME યુનિટ્સ માટે ઉત્પાદન ખર્ચ ઘટાડવો અને નાણાકીય જોખમ વગર સ્થિરતા લાવવી સૌથી મોટો પડકાર છે. Indian Ceramics Asia 2026 જેવી પ્રદર્શનો phased-upgrade માટે ઉપયોગી ટેકનોલોજીઓ રજૂ કરે છે, જે ROI આધારિત અને સાવચેત રોકાણ માટે માર્ગદર્શન પૂરું પાડે છે.”
2026 એડિશનની વિશેષતા તરીકે “Innovation Exchange Forum” ખાસ આકર્ષણનું કેન્દ્ર બન્યું છે, જે “Ceramics for Tomorrow: Sustainable, Smart and Advanced” થીમ પર આધારિત છે. આ ફોરમ હેઠળ ઊર્જા વ્યવસ્થાપન, રો મટીરીઅલ્સ ઑપ્ટિમાઇઝેશન, ડિજિટલાઇઝેશન, વિકલ્પ ઇંધણ અને પર્યાવરણીય નિયમન જેવા મહત્વપૂર્ણ વિષયો પર સેમિનારો યોજાઈ રહ્યા છે.
આ ઉપરાંત “Live Demonstration Area” પણ ખાસ ધ્યાન ખેંચી રહ્યો છે, જ્યાં મશીનરી અને પ્રોસેસિંગ ટેકનોલોજી વાસ્તવિક ઓપરેટિંગ પરિસ્થિતિમાં રજૂ કરવામાં આવી છે. આથી ખરીદદારોને મશીનરીની કાર્યક્ષમતા અને પોતાની યુનિટ માટેની યોગ્યતા સમજવામાં સરળતા મળી રહી છે.
મેસે મૂંચેનના ગ્લોબલ ઇન્ડસ્ટ્રી લીડ શ્રી રોબર્ટ શોનબર્ગરે જણાવ્યું હતું કે, “હાલના પડકારો છતાં ભારતીય સીરામિક ઉદ્યોગ વૈશ્વિક સપ્લાયર્સ માટે આકર્ષક છે. હવે મુખ્ય ફોકસ ઓટોમેશન, ડિજિટલ પ્રોસેસ કંટ્રોલ અને ઊર્જા ઑપ્ટિમાઇઝેશન પર જોવા મળે છે, જે ભારતીય ઉત્પાદનોને આંતરરાષ્ટ્રીય ધોરણો નજીક લઈ જાય છે.”
યુનિફેર એક્ઝિબિશન્સ સર્વિસ કો. લિ. ના જનરલ મેનેજર શ્રી કેન વોંગે જણાવ્યું હતું કે, “ભારતીય કંપનીઓ હવે માત્ર સોર્સિંગ નહીં, પરંતુ લાઇફસાયકલ ખર્ચ, પ્રક્રિયા સ્થિરતા અને લાંબા ગાળાના વળતર પર ગંભીરતાથી વિચાર કરી રહી છે. Innovation Exchange Forum અને Live Demo Area જેવા પ્લેટફોર્મ્સ ખાસ કરીને મધ્યમ કદના ઉત્પાદકો માટે જાણકારીપૂર્વક રોકાણના નિર્ણય લેવામાં મદદરૂપ બની રહ્યા છે.”
ઘરેલું માંગ ધીમે ધીમે સ્થિર થઈ રહી છે અને નિકાસ બજારો વધુ પસંદગીભર્યા બનતાં જાય છે ત્યારે Indian Ceramics Asia 2026 સીરામિક ઉદ્યોગના બદલાતા સ્વરૂપનું સ્પષ્ટ પ્રતિબિંબ પૂરું પાડે છે, જ્યાં કાર્યક્ષમતા, ટકાઉ વિકાસ અને સ્માર્ટ મેન્યુફેક્ચરિંગ કેન્દ્રસ્થાને છે.
