દોસ્તી, યારી, મિત્રતા… આ શબ્દો નથી, એક અમૂલ્ય અનુભૂતિ છે, જે જીવનના રંગહીન કેનવાસ પર પ્રેમ, વિશ્વાસ અને હાસ્યના રંગો ભરે છે. આજે, Friendship Day, એ દિવસ છે જ્યારે આપણે આ નિસ્વાર્થ બંધનની ઉજવણી કરીએ છીએ, જે શબ્દોની મર્યાદાઓથી પર છે અને હૃદયના ઊંડાણમાં વસે છે. મિત્રતા એ એવું ગીત છે, જેના સૂર આપણા જીવનને મધુર બનાવે છે, અને એવી નદી છે, જે દુઃખના રણમાં પણ આનંદનો પ્રવાહ લાવે છે.
મિત્રતા: જીવનનું અમૂલ્ય રત્ન છે. જીવન એક સફર છે, અને આ સફરમાં મિત્રો એવા સાથીઓ છે, જે રસ્તાના ખાડાઓમાં હાથ પકડે છે, અને ખુશીની ચરમસીમાએ સાથે નાચે છે. મિત્ર એ નથી જે ફક્ત તમારી સફળતામાં તાળીઓ પાડે, પણ એ છે જે તમારી નિષ્ફળતામાં તમારા ખભે હાથ મૂકી કહે, “ચિંતા નહીં, હું છું ને!” મિત્રતા એટલે એવું આકાશ, જ્યાં તમે ખુલ્લા દિલે ઉડી શકો; એવું ઘર, જ્યાં તમે બધું શેર કરી શકો – હાસ્ય, આંસુ, સપનાં, અને ડર પણ.
જીવનનો અડધો ભાગ આપણે આપણી પસંદગીઓથી ઘડીએ છીએ, અને બાકીનો અડધો એ મિત્રો ઘડે છે, જે આપણે હૃદયની નજરે ચૂંટીએ છીએ. એક સાચો મિત્ર એ ઢાલ છે, જે બોલ્યા વિના તમારું રક્ષણ કરે; એ દીવો છે, જે અંધકારમાં પણ આશાનો પ્રકાશ ફેલાવે. એ દેવદૂત છે, જેની આંખોમાં બુદ્ધની કરુણા, વાણીમાં શ્રીકૃષ્ણનો મધુર ટંકાર, અને હૃદયમાં કર્ણનો અપ્રતિમ ત્યાગ હોય.
મિત્રતા એટલે નિસ્વાર્થ ભાવના, જ્યાં “હું” નહીં, “આપણે” નો સૂર ગુંજે. એક સાચો મિત્ર એ છે, જે તમારા દુઃખમાં પડખે ઉભો રહે, તમારી મૂંઝવણોને ફટાફટ હળવી કરી દે, અને તમારા સપનાંને પાંખો આપે. યાદ છે ને, બાળપણના એ દિવસો, જ્યારે શાળાના મેદાનમાં દોસ્તો સાથે રમતાં-રમતાં સમય કેવો ઉડી જતો? કે પછી રાત્રે મિત્રો સાથે લાંબી ચર્ચાઓ, જેમાં દુનિયાની બધી સમસ્યાઓ હલ થઈ જતી? આવી યાદો જ તો મિત્રતાની સુગંધ છે, જે જીવનભર સાથે રહે છે.
આજના સ્વાર્થી અને ઝડપી યુગમાં, જ્યાં સંબંધો ઘણીવાર લાભ-નુકસાનના ત્રાજવે તોલાય છે, ત્યાં સાચા મિત્રનું મળવું એ સાક્ષાત ઈશ્વરનો ચમત્કાર છે. મોબાઈલની ચમકથી થાકેલું મન જ્યારે મિત્રોના મેળાવડાને ઝંખે છે, ત્યારે એક દોસ્તની હાજરી જીવનને જન્નતમાં ફેરવી દે છે. મિત્રો એવા હોય છે, જે સામાન્ય લાગે, પણ જરૂર પડે ત્યારે આફતોને પોતાના ખભે ઉપાડી લે. એ ઢોલ નથી, જે ફક્ત બોલે; એ ઢાલ છે, જે ચૂપચાપ તમારી રક્ષા કરે.
મિત્રતા એ એવું અમૃત છે, જે ધરતીને વૈકુંઠમાં ફેરવી શકે. દોસ્તની સોબતમાં નર્ક પણ સ્વર્ગ લાગે, અને દોસ્તથી દૂર હોવું પડે તો સ્વર્ગ પણ નર્ક બની જાય. એક સાચો મિત્ર એ છે, જે તમારી ખામીઓને સ્વીકારે, તમારી શક્તિને ઉજાગર કરે, અને તમને હંમેશા એ બનવા પ્રેરે, જે તમે ખરેખર છો. એવા મિત્રનું મૃત્યુ નહીં, પણ મિત્રતાનું મૃત્યુ માણસને અસહ્ય લાગે છે, કારણ કે મિત્ર એ લોહીનો સંબંધ નથી, પણ હૃદયનો સંબંધ છે.
ઈશ્વર માતા-પિતા, ભાઈ-બહેન આપે છે, પણ મિત્રોને આપણે શોધીએ છીએ. પણ ખરેખર, મિત્ર શોધનો વિષય નથી, એ તો જીવનનું સાધન બની જાય છે. એક એવો સાથી, જે વિપરીત પરિસ્થિતિમાં સૌથી પહેલો પડખે આવે, તમારા પર આવતા પ્રહારોને પોતાની તરફ ખુશીથી વાળી લે, અને તમારા સપનાંને પોતાના જેટલું જ મહત્ત્વ આપે.
કોઈ પૂછે કે, “શું મિત્રતા જેવા પવિત્ર સંબંધને ઉજવવા માટે ફક્ત એક દિવસ જ પૂરતો છે?” તો જવાબ એ છે કે, આ દિવસ ફક્ત એક બહાનું છે – એ બધા મિત્રોને યાદ કરવાનું, જૂની યાદોને તાજી કરવાનું, અને એમને હૃદયપૂર્વક શુભેચ્છા આપવાનું. આ દિવસ આપણને યાદ અપાવે છે કે, જીવનની ભાગદોડમાં થોડીવાર રોકાઈને એ લોકોને સમય આપવો, જે આપણા જીવનને અર્થ આપે છે.
આજે હું મારા બધા મિત્રોને યાદ કરું છું – એ બાળપણના દોસ્તો, જેની સાથે નાની-નાની વાતોમાં હાસ્યના ફુવારા ફૂટતા; એ યુવાનીના યારો, જેની સાથે રાતોની ચર્ચાઓએ જીવનના રહસ્યો ખોલ્યા; અને એ મિત્રો, જે આજે પણ મારી ખુશીઓમાં શરીક થાય છે, અને મારા દુઃખમાં પડખે ઉભા રહે છે. હું પ્રાર્થના કરું છું કે ઈશ્વર એમને હંમેશા સફળતા, સુખ અને આરોગ્ય આપે, અને એમનું જીવન આનંદથી છલકાય.તો આવો, આ Friendship Day ને ખુલ્લા દિલે ઉજવીએ! તમારા મિત્રોને એક ફોન કરો, એક મેસેજ મોકલો, કે એમની સાથે થોડો સમય વિતાવો. કહો એમને કે, “તું છે એટલે જીવન જીવવું સરળ લાગે છે!” તમને એવા સાચા મિત્રો મળે, જે તમારા જીવનને હાસ્ય, પ્રેમ અને આશાથી ભરી દે. એવા મિત્રો, જેની સાથે દરેક લહેરો આનંદ બની જાય, અને દરેક પડકાર નાનો લાગે.. દેવેન રબારી તરફથી આપ સૌને મિત્રતા દિવસની હાર્દિક શુભકામનાઓ! 🌈💐
મિત્રતાના આ બંધનને હંમેશા ચેરિશ કરો, અને તમારી ઝોળી હંમેશા મિત્રોના પ્રેમથી છલકાતી રહે!
-ડો.દેવેન રબારી, (યંગ ઇન્ડિયા ગ્રૂપ)
