મોરબી : મોરબી સ્થિત ઉમા વિદ્યા સંકુલના ધોરણ 7ના વિદ્યાર્થીઓએ મોરબી જિલ્લા પોલીસ વડાની કચેરીની શૈક્ષણિક મુલાકાત લીધી હતી. આ મુલાકાતનો મુખ્ય હેતુ “નેત્રમ પ્રોજેક્ટ” અંગે વિસ્તૃત જાણકારી મેળવવાનો હતો. વિદ્યાર્થીઓને આ પ્રોજેક્ટ કેવી રીતે કાર્ય કરે છે તથા જાહેર સુરક્ષા માટે તે કેવી રીતે ઉપયોગી સાબિત થાય છે તેની સચોટ અને સરળ સમજ આપવામાં આવી હતી.
નેત્રમ પ્રોજેક્ટ ઉપરાંત વિદ્યાર્થીઓએ પોલીસ વડાની કચેરીના અન્ય વિવિધ વિભાગોની પણ મુલાકાત લીધી હતી. જેમાં કંટ્રોલ રૂમ, ટ્રાફિક વિભાગ તથા કાયદો-વ્યવસ્થા સંભાળતા વિભાગોની કામગીરી અંગે માહિતી આપવામાં આવી હતી. આ મુલાકાત દ્વારા વિદ્યાર્થીઓને પોલીસ વિભાગની દૈનિક કામગીરી તથા જાહેર સુરક્ષા વ્યવસ્થાની પ્રાયોગિક સમજ મળી હતી.
આ અવસર પર મોરબીના પોલીસ અધિક્ષક મુકેશ કુમાર પટેલે વિદ્યાર્થીઓ સાથે સ્નેહભર્યો સંવાદ કર્યો હતો. તેમણે ખૂબ જ હળવી અને પ્રેરણાત્મક શૈલીમાં માર્ગ સલામતી અંગે માર્ગદર્શન આપ્યું હતું અને ખાસ કરીને બાળકો મારફતે તેમના માતા-પિતાને ફરજિયાત હેલ્મેટ પહેરવાની મહત્વતા અંગે સંદેશ આપ્યો હતો. મુલાકાતના અંતે ઉમા વિદ્યા સંકુલના સંસ્થાના પ્રમુખ અશ્વિનભાઈ અઘારાએ પોલીસ અધિક્ષક કચેરી તથા સમગ્ર પોલીસ સ્ટાફનો આ શૈક્ષણિક અને માહિતીસભર મુલાકાત માટે દિલથી આભાર વ્યક્ત કર્યો હતો. આ મુલાકાત વિદ્યાર્થીઓ માટે અત્યંત ઉપયોગી, જ્ઞાનવર્ધક અને પ્રેરણાદાયી સાબિત થઈ હતી.
