મોરબી અને માળિયા મિયાણા પોલીસ સ્ટેશન વિસ્તારમાં પોલીસે જુગારના અલગ-અલગ પાંચ સ્થળો પર દરોડા પાડીને વર્લી-મટકા અને નોટ-નંબરીનો જુગાર રમતા શખ્સોને સાહિત્ય તથા રોકડ રકમ સાથે ઝડપી લીધા છે. પોલીસે આ તમામ બનાવોમાં કાયદેસરની કાર્યવાહી હાથ ધરી છે.
માળિયા મિયાણા પોલીસ સ્ટેશનની ટીમે મોટી બરાર ગામ પાસે ઇન્ડિયન ઓઇલ પેટ્રોલ પંપની પાછળ જાહેરમાં ડાયરી અને બોલપેન વડે વર્લીફીચરનો જુગાર રમી રહેલા દોસમામદ મહમદભાઇ કટીયા (રહે. જુના રેલ્વે સ્ટેશન પાસે, માળિયા મિયાણા) ને રોકડા રૂપિયા ૧૪૦ ના મુદ્દામાલ સાથે ઝડપી લીધો હતો.
મોરબી સિટી એ ડિવિઝન પોલીસે કબીર ટેકરી શેરી નંબર-૨ માં જાહેર રસ્તા પર દરોડો પાડ્યો હતો. જ્યાં મોબાઇલ ફોનથી વર્લી મટકાનો જુગાર રમતા સીરાજ ઇકબાલભાઇ અજમેરીને રૂ. ૩,૦૦૦ નો મોબાઇલ અને રૂ. ૨૫૦ ની રોકડ મળી કુલ રૂ. ૩,૨૫૦ ના મુદ્દામાલ સાથે પકડી પાડ્યો હતો, જ્યારે જુગાર રમાડતો અન્ય આરોપી અવેશ અયુબભાઇ કાશમાણી રેઇડ દરમિયાન નાસી છૂટ્યો હતો.
બીજા દરોડામાં મોરબી સિટી એ ડિવિઝન પોલીસની ટીમે જુના બસ સ્ટેશન પાસે જાહેરમાં ચલણી નોટોના નંબર ઉપર રૂપિયાની હાર-જીતનો જુગાર રમતા ત્રણ શખ્સો આસીફ હાજીભાઇ જીગીયા, દાઉદ સફીભાઇ લોકાવાળા અને ઇબ્રાહીમ અલીભાઇ દલને રોકડા રૂપિયા ૨,૧૦૦ ના મુદ્દામાલ સાથે ઝડપી લીધા હતા.
ત્રીજા દરોડામાં મોરબી સિટી એ ડિવિઝન પોલીસે વાઘપરાના નાકે જાહેર રસ્તા પર રેઇડ કરીને મોબાઇલ ફોન દ્વારા વર્લી મટકાના આંકડાનો જુગાર રમતા મોહિન મુસ્તાકભાઇ અજમેરી (રહે. કબીર ટેકરી) ને રૂ. ૫,૦૦૦ ની કિંમતનો મોબાઇલ અને રોકડા રૂ. ૭૫૦ મળી કુલ રૂ. ૫,૭૫૦ ના મુદ્દામાલ સાથે ઝડપી લીધો હતો, જ્યારે તેની સાથે જુગાર રમતો હરીભાઇ (રહે. રણછોડ નગર) નામનો શખ્સ નાસી છૂટ્યો હતો.
વાઘપરાના નાકે જાહેર રસ્તા પર જ મોરબી સિટી એ ડિવિઝન પોલીસે કરેલા અન્ય એક દરોડામાં, પોતાના મોબાઇલ ફોન પર વર્લી મટકાનો જુગાર રમી રહેલા વેપારી હરેશ પુરણભાઇ થાવરાણી (રહે. લાયન્સનગર, નવલખી રોડ, મોરબી) ને રૂ. ૫,૦૦૦ ની કિંમતનો મોબાઇલ અને રોકડા રૂ. ૭૫૦ મળી કુલ રૂ. ૫,૭૫૦ ના મુદ્દામાલ સાથે પકડી લેવામાં આવ્યો હતો.
