ડો. દેવેન રબારીએ પોતાની લગ્ન વર્ષગાંઠ અને દીકરી મનસ્વીના જન્મદિવસ નિમિત્તે પછાત વિસ્તારના બાળકોને ભોજન કરાવ્યું
મોરબી: મોરબીમાં સામાજિક ઉત્તરદાયિત્વ અને માનવતાના કાર્યોમાં હંમેશા અગ્રેસર રહેતા યંગ ઇન્ડિયા ગ્રુપના સ્થાપક ડો. દેવેનભાઈ રબારીએ પોતાના જીવનના 2 અનમોલ અવસરોની ઉજવણી અતિશય પ્રેરણાદાયી અને પરમાર્થના માર્ગે કરી છે. આજરોજ તેમની વ્હાલસોયી દીકરી મનસ્વીના જન્મદિવસ અને પોતાના લગ્નની વર્ષગાંઠના પ્રસંગે તેઓએ ‘યંગ ઇન્ડિયા ગ્રુપ’ની ગૌરવશાળી પરંપરાને આગળ ધપાવી હતી. આ અંતર્ગત સંસ્થાના “આપવાનો આનંદ” કાર્યક્રમ હેઠળ ઝૂંપડપટ્ટી અને પછાત વિસ્તારના વંચિત બાળકો સાથે ખુશીઓની વહેંચણી કરવામાં આવી હતી.
આ મંગલમય દિવસે ડૉ. દેવેન રબારી અને તેમના પરિવારે ભપકાદાર ખર્ચાઓથી દૂર રહીને, સમાજના છેવાડાના શ્રમિક અને ગરીબ પરિવારોના બાળકોને ભાવતું ભોજન કરાવ્યું હતું. ચૈતન્ય સમાન અને ઈશ્વરનું રૂપ ગણાતા આ બાળદેવતાઓને તૃપ્ત કરી, તેમના ચહેરા પરનું નિર્દોષ સ્મિત જોઈને પરિવારે ધન્યતાનો અનુભવ કર્યો હતો. આ પવિત્ર કાર્ય થકી બાળમિત્રોના અંતરના આશીર્વાદ મેળવી દીકરી મનસ્વીના ભવિષ્યને સુરક્ષિત અને સંસ્કારી બનાવવાનો એક સ્તુત્ય પ્રયાસ કરાયો હતો.
આ પ્રસંગે ડૉ. દેવેન રબારીએ ‘યંગ ઇન્ડિયા ગ્રુપ’ની વિચારધારાને બિરદાવતા જણાવ્યું હતું કે, “યંગ ઇન્ડિયા ગ્રુપ માત્ર એક સંસ્થા નથી, પણ મોરબીમાં સદભાવના, સમાનતા અને સેવાનો જીવંત ધબકારો છે. કોઈપણ નાત-જાતના ભેદભાવ વિના સમાજના પછાત વર્ગને મુખ્ય પ્રવાહમાં લાવવા અને તેમના જીવનમાં ખુશીઓ રંગવા માટે આ ગ્રુપ હંમેશા દીવાદાંડી સમાન કાર્ય કરે છે. ‘આપવાનો આનંદ’ એ માત્ર એક પ્રોજેક્ટ નથી, પરંતુ સમાજ પ્રત્યેની આપણી સંવેદનશીલતા પ્રગટ કરવાનું એક પવિત્ર માધ્યમ છે.”
આ અનોખી ઉજવણીના માધ્યમથી ડૉ. દેવેન રબારીએ સમગ્ર મોરબી અને સમાજના નાગરિકોને એક હૃદયસ્પર્શી અપીલ કરી છે કે, “આપણે આપણા કે આપણા પ્રિયજનોના જન્મદિવસ, લગ્નતિથિ કે અન્ય ખુશીના પ્રસંગો પાછળ જે આંધળો ખર્ચ કરીએ છીએ, તેના બદલે સમાજના આવા વંચિત અને જરૂરિયાતમંદ બાળકો વચ્ચે જઈને ઉજવણી કરવી જોઈએ. હોટલો કે પાર્ટી પ્લોટના કૃત્રિમ આનંદ કરતાં, ભૂખ્યાને અન્ન આપીને મેળવેલો ‘આપવાનો આનંદ’ અલૌકિક અને અદભુત હોય છે. આવો, આપણે સૌ સાથે મળીને આવી અનોખી ઉજવણીની પરંપરા શરૂ કરીએ અને કોઈકના જીવનમાં ઉજાસ પાથરીને સાચા અર્થમાં ધન્યતા પ્રાપ્ત કરીએ.” આ ભગીરથ કાર્યમાં યંગ ઇન્ડિયા ગ્રુપના સભ્યો અને સેવાભાવી મિત્રોએ હાજર રહી કાર્યક્રમને સફળ બનાવ્યો હતો.
