મોરબી: મોરબી મહાનગરપાલિકાની મિલકતવેરા શાખા દ્વારા બાકીદારો સામે કડક ઝુંબેશ હાથ ધરવામાં આવી છે. વર્ષ 2025-26નો મિલકત વેરો ભરપાઈ ન કરનારા આસામીઓ વિરુદ્ધ વોરંટ બજવણી અને સીલિંગની કામગીરી વધુ કડક બનાવવામાં આવી છે.
કડક કાર્યવાહીની વિગતો
મિલકતો સીલ: ગત અઠવાડિયા દરમિયાન ટેક્સ ન ભરનારા 312 આસામીઓને નોટિસ આપવામાં આવી હતી, જેમાંથી વોરંટ બાદ પણ વેરો ન ભરનાર 37 આસામીઓની મિલકતો પાલિકા દ્વારા સીલ કરી દેવામાં આવી છે.
કરોડોની આવક: આ ઝુંબેશ દરમિયાન શહેર વિસ્તારમાંથી કુલ ₹2,48,40,503 અને વિવિધ ક્લસ્ટર તેમજ ગ્રામ્ય વિસ્તારોમાંથી ₹2,12,83,844 મળીને મોટી રકમની વસૂલાત કરવામાં આવી છે.
નવી નોટિસો: હાલ ટેક્સ શાખા દ્વારા વધુ 1200 જેટલા બાકીદારોને માંગણા નોટિસ આપવાની પ્રક્રિયા પણ શરૂ કરી દેવામાં આવી છે.
ક્યાં અને કેવી રીતે ટેક્સ ભરી શકાશે?
નાગરિકોની સુવિધા માટે પાલિકાએ ઓનલાઈન અને ઓફલાઈન બંને વ્યવસ્થા કાર્યરત રાખી છે:
ઓનલાઈન: પાલિકાની વેબસાઈટ mmcqujarat.in અથવા Play Store પરથી ‘Morbi Municipal Corporation’ એપ્લિકેશન ડાઉનલોડ કરીને ઘરે બેઠા વેરો ભરી શકાશે.
ઓફલાઈન (રૂબરૂ): મહાનગરપાલિકાની કચેરી ખાતે સવારે 10:30 થી સાંજે 5:00 સુધી (રૂમ નં. 9 માં POS મશીનની સુવિધા ઉપલબ્ધ છે).
ક્લસ્ટર ઓફિસ: નાની વાવડી, અમરેલી, મહેન્દ્રનગર, ભડીયાદ, ત્રાજપર, ગ્રીનચોક લાઈબ્રેરી, વાંકાનેર દરવાજા, શનાળા, રવાપર અને લીલાપર જેવી 11 ક્લસ્ટર ઓફિસો પર સવારે 10:30 થી 4:00 વાગ્યા સુધી ટેક્સ સ્વીકારવામાં આવશે.
મહાનગરપાલિકા દ્વારા તમામ મિલકતધારકોને અપીલ કરવામાં આવી છે કે સીલિંગ જેવી કડક કાર્યવાહીથી બચવા માટે પોતાનો બાકી વેરો સત્વરે ભરી દેવો.
