મોરબી : અખિલ ભારતીય રાષ્ટ્રીય શૈક્ષિક મહાસંઘ (ABRSM) દ્વારા આયોજિત સૌરાષ્ટ્ર ઝોન ક્રિકેટ ટુર્નામેન્ટને લઈને સમગ્ર રાજ્યના શૈક્ષણિક જગતમાં ખેલદિલીનો માહોલ જોવા મળી રહ્યો છે. આ શૃંખલાના ભાગરૂપે મોરબી જિલ્લાની મજબૂત ટીમ તૈયાર કરવા માટે નાની વાવડી ખાતે આવેલ સરદાર સ્ટેડિયમમાં ભવ્ય પસંદગી કેમ્પનું આયોજન કરવામાં આવ્યું હતું.
આ પસંદગી કેમ્પમાં મોરબી જિલ્લાના ખૂણેખૂણેથી શિક્ષક ખેલાડીઓએ પોતાની પ્રતિભા દર્શાવવા હાજરી આપી હતી. જેમાં મોરબી, ટંકારા, હળવદ અને વાંકાનેર વિસ્તારના ખેલાડીઓ મોટી સંખ્યામાં ઉત્સાહભેર જોડાયા હતા. મેદાન પર શિક્ષકોની બેટિંગ, બોલિંગ અને ફિલ્ડિંગમાં વ્યાવસાયિક ખેલાડીઓ જેવો જ જોશ જોવા મળ્યો હતો. કાર્યક્રમ દરમિયાન શૈક્ષિક મહાસંઘના અગ્રણીઓ ઉપસ્થિત રહ્યા હતા. તેઓએ ખેલાડીઓને રમતગમતનું મહત્વ સમજાવી પ્રોત્સાહિત કર્યા હતા અને ટુર્નામેન્ટ માટે જરૂરી ટેકનિકલ માર્ગદર્શન પૂરું પાડ્યું હતું.
પસંદગી પ્રક્રિયાને વધુ સચોટ બનાવવા માટે ખેલાડીઓ વચ્ચે પ્રેક્ટિસ મેચનું પણ આયોજન કરવામાં આવ્યું હતું. નોંધનીય છે કે, હોળીના પવિત્ર તહેવાર નિમિત્તે વાવડી ખાતે ખાસ ટેનિસ ક્રિકેટ મેચ રમાઈ હતી, જેમાં ખેલાડીઓએ રમત સાથે ઉત્સવની પણ ઉજવણી કરી હતી.પસંદગી સમિતિના તુષારભાઈ બોપલીયા અને નરેશભાઈ જગોદણા દ્વારા ખેલાડીઓના ફોર્મ અને કૌશલ્યને આધારે અંતિમ ટીમની જાહેરાત કરવામાં આવશે. આ પસંદ થયેલા ખેલાડીઓ આગામી સમયમાં રાજકોટ જિલ્લાના ગોંડલ ખાતે યોજાનારી સૌરાષ્ટ્ર ઝોન કક્ષાની સ્પર્ધામાં મોરબી જિલ્લા વતી મેદાને ઉતરશે.
શૈક્ષણિક કાર્યની સાથે સાથે રમતગમત પ્રત્યે શિક્ષકોનો આ લગાવ જોઈને સંસ્થાના હોદ્દેદારોએ આનંદ વ્યક્ત કર્યો હતો. આ ટુર્નામેન્ટ દ્વારા શિક્ષકોમાં પરસ્પર ભાઈચારો વધે અને માનસિક સ્વાસ્થ્ય જળવાય તેવો ઉમદા હેતુ સંગઠન દ્વારા રાખવામાં આવ્યો છે.
