ટંકારા પોલીસે “તેરા તુજકો અર્પણ” કાર્યક્રમ હેઠળ લૂંટના ગુનામાં ગુમાવેલા નાણાં ફરીયાદીને પરત કર્યા છે. જેમાં પોલીસે રૂ. ૬,૫૦,૦૦૦ રિકવર કરીને ફરિયાદીને પરત સોંપ્યા છે.
૨૧ મે, ૨૦૨૫ના રોજ, રાજકોટના નીલેશભાઈ ભાલોડીની ટી. એન્ટરપ્રાઈઝ (ટીટેનીયમ) નામની આંગળીયા પેઢીના રૂ. ૯૦,૦૦,૦૦૦ લઈ રાજકોટથી મોરબી આવતા સમયે લૂંટ થઈ હતી. આરોપીઓએ તેમની XUV-300 ગાડીનો પીછો કરીને ટંકારાના ખજુરા રિસોર્ટના પાર્કિંગમાંથી લૂંટને અંજામ આપ્યો હતો. આ ગુનામાં કુલ ૯ આરોપીઓ સંડોવાયેલા હતા. ટંકારા પોલીસે તેમાંથી ૭ આરોપીઓની ધરપકડ કરી હતી. અગાઉ, પોલીસે રૂ. ૭૨,૫૦,૦૦૦ રિકવર કર્યા હતા, જે ફરિયાદીને પરત સોંપાયા હતા. ત્યારે હાલ પોલીસ દ્વારા બાકીના આરોપીઓ પાસેથી રૂ. ૬,૫૦,૦૦૦ની રકમ રિકવર કરવામાં આવી છે. જે ફરિયાદીને પરત આપવામાં આવી છે. આ સાથે, લૂંટાયેલા કુલ રૂ. ૯૦,૦૦,૦૦૦ માંથી કુલ રૂ. ૭૯,૦૦,૦૦૦ની રકમ રિકવર થઈને પરત મળી છે.
