વિકાસ કામો સમય મર્યાદામાં ગુણવત્તાપૂર્વક પૂર્ણ કરવા અધિકારીઓને તાકીદ કરતા પ્રભારી મંત્રીશ્રી ત્રિકમભાઈ છાંગા
મોરબી જિલ્લા આયોજન મંડળની બેઠક ગુજરાતના રાજ્યકક્ષાના ઉચ્ચ અને તાંત્રિક શિક્ષણ વિભાગના મંત્રીશ્રી ત્રિકમભાઈ છાંગાના અધ્યક્ષસ્થાને કલેકટર કચેરી ખાતે યોજાઇ હતી
આ બેઠકમાં રદ/ ફેરફારના કામોને બહાલી આપવા, વિકેન્દ્રિત જિલ્લા આયોજન કાર્યક્રમની વિવિધ જોગવાઇની નવી દરખાસ્તો મંજૂર કરવા, સામાજિક શૈક્ષણિક પછાત યોજનાની નવી દરખાસ્તો મંજૂર કરવા તેમજ વિકેન્દ્રિત જિલ્લા આયોજન કાર્યક્રમની વિવિધ જોગવાઇના કામોની તથા સાંસદ અને ધારાસભ્યના વિસ્તારના વિકાસ યોજનાના કામોની પ્રભારી મંત્રીશ્રી સમીક્ષા કરાઈ હતી. તેમજ પૂર્ણ થયેલા તમામ કામો પોર્ટલ ઉપર ચડાવવા પણ જણાવ્યું હતું.
આ બેઠકમાં પ્રભારી મંત્રીશ્રી ત્રિકમભાઈ છાંગાએ પ્રગતિ હેઠળના તથા નવા કામો સમય મર્યાદામાં ગુણવત્તાપૂર્વક રીતે પૂર્ણ કરવા તેમજ નવા કામો અને ફેરફાર વાળા કામની દરખાસ્તનો પૂર્ણ અભ્યાસ કરીને રજૂ કરવા જણાવ્યું હતું. અધિક નિવાસી કલેક્ટર શ્રી એસ. જે. ખાચર અને આયોજન અધિકારીશ્રી માંડલિયા દ્વારા બેઠકનું સંચાલન થયું હતું.
આ તકે જિલ્લા પંચાયત પ્રમુખશ્રી હંસાબેન પારેધી, ધારાસભ્ય શ્રી દુર્લભજીભાઈ દેથરિયા અને શ્રી મેઘજી ચાવડા,મોરબી જીલ્લા ભાજપ પ્રમુખ જ્યંતિભાઈ રાજકોટીયા,મોરબી કલેક્ટરશ્રી કે. બી. ઝવેરી, મ્યુ. કમિશનરશ્રી સ્વપ્નિલ ખરે, પોલિસી અધિક્ષકશ્રી મુકેશ પટેલ, જિલ્લા વિકાસ અધિકારીશ્રી નવલદાન ગઠવી, સહિતના અધિકારીઓ, પદાધિકારીઓ ઉપસ્થિત રહ્યા હતા.
