મોરબી : આગામી ચોમાસાને ધ્યાનમાં રાખીને મોરબી મહાનગરપાલિકાના વોર્ડ નં. 12 ના કોર્પોરેટર મેઘાબેન દિપકભાઈ પોપટ દ્વારા મ્યુનિસિપલ કમિશનરને એક લેખિત રજૂઆત કરવામાં આવી છે. આ રજૂઆતમાં ચોમાસા દરમિયાન શહેરીજનોને હાલાકી ન પડે અને જનજીવન સુરક્ષિત રહે તે માટે પ્રી-મોન્સૂન કામગીરી તાત્કાલિક ધોરણે શરૂ કરવા માંગ કરવામાં આવી છે.
રજૂઆતમાં દર્શાવેલા મુખ્ય મુદ્દાઓ
ભૂગર્ભ ગટર, વોકળા અને નાળાઓની સફાઈ: વોર્ડમાં આવેલા તમામ નાના-મોટા વોકળાઓ અને મુખ્ય નાળાઓમાં જમા થયેલો કચરો તથા પ્લાસ્ટિક કાઢી ડી-સિલ્ટિંગ કરવા, તેમજ વરસાદી પાણીના નિકાલમાં અવરોધ ઉભો ન થાય તે માટે ભૂગર્ભ ગટરની લાઈનો અને મેનહોલની સંપૂર્ણ સફાઈ કરવા જણાવાયું છે.
પાણીના ભરાવાનું નિવારણ: ગત વર્ષોમાં જ્યાં પાણી ભરાવાની ગંભીર સમસ્યાઓ સર્જાઈ હતી તેવા નીચાણવાળા વિસ્તારોમાં પાણીના તાત્કાલિક નિકાલ માટે સેક્શન પંપની વ્યવસ્થા કરવા અને સ્ટોર્મ વોટર ડ્રેન્સ રિપેર કરવા રજૂઆત કરાઈ છે.
રસ્તાઓનું સમારકામ (પેચવર્ક): રસ્તાઓ પર ખોદકામથી થયેલા મોટા ખાડાઓનું ચોમાસા પહેલા યોગ્ય મેટલિંગ અને પેચવર્ક પૂરું કરવા માંગ કરાઈ છે, જેથી રસ્તા ધોવાઈ ન જાય અને અકસ્માતો નિવારી શકાય.
જોખમી વૃક્ષો અને હોર્ડિંગ્સ હટાવવા: વાવાઝોડા કે ભારે પવન વખતે વીજળીના તારને અડકતી વૃક્ષોની ડાળીઓ તૂટી પડવાની સંભાવના હોવાથી તેનું સાયન્ટિફિક ટ્રીમિંગ કરવા અને શહેરમાં લગાવેલા અનધિકૃત તેમજ જોખમી હોર્ડિંગ્સ/બેનરો દૂર કરવા જણાવાયું છે.
સ્ટ્રીટ લાઈટ અને વીજ વાયરોની સુરક્ષા: ચોમાસામાં શોર્ટ-સર્કિટથી કરંટ લાગવાની ઘટનાઓ ન બને તે માટે પબ્લિક સ્ટ્રીટ લાઈટના ખુલ્લા વાયરો અને પોલનું ઇન્સ્યુલેશન ચેક કરવા તથા રાત્રિના સમયે અંધારું ન રહે તે માટે બંધ સ્ટ્રીટ લાઈટો તાત્કાલિક ચાલુ કરવા જણાવાયું છે.
જંતુનાશક દવાઓનો છંટકાવ (રોગચાળો અટકાવવા પગલાં): વરસાદી પાણી ભરાવાના કારણે મચ્છરો અને રોગચાળો ન ફેલાય તે માટે અત્યારથી જ ફોગિંગ અને એન્ટી-લાર્વા કામગીરીનું શિડ્યુલ બનાવી દવાઓનો છંટકાવ શરૂ કરવા અપીલ કરાઈ છે.
ડિઝાસ્ટર મેનેજમેન્ટ અને કંટ્રોલ રૂમ: ચોમાસા દરમિયાન નાગરિકોની ફરિયાદોના ત્વરિત નિકાલ માટે 24×7 કાર્યરત કંટ્રોલ રૂમ શરૂ કરવા અને ઈમરજન્સી રિસ્પોન્સ ટીમ (JCB, ડીવોટરિંગ પંપ અને જરૂરી સ્ટાફ) સ્ટેન્ડબાય રાખવા માંગ કરવામાં આવી છે.
અંતમાં, મેઘાબેન પોપટે વહીવટી તંત્રને યુદ્ધના ધોરણે આ પ્રી-મોન્સૂન કામગીરી શરૂ કરવા કડક આદેશો આપવા અપીલ કરી છે, જેથી મોરબીના નાગરિકોને સુરક્ષિત અને સુવિધાજનક ચોમાસું મળી શકે.
