જિલ્લા પ્રભારી મંત્રીશ્રી ત્રિકમભાઈ છાંગાએ બેઠા પુલ પાસે શ્રમદાન કરી સ્વચ્છતાનો સંદેશ આપ્યો
મોરબી ડેઈલી:મોરબી જિલ્લામાં ‘સેવા સંકલ્પ અભિયાન’ અને ‘સ્વચ્છતા હી સેવા’ ની ઉજવણીના ભાગરૂપે પર્યાવરણની જાળવણી અને સ્વચ્છતા પ્રત્યે જાગૃતિ કેળવવાના આશયથી ખાસ શ્રમદાન કાર્યક્રમનું આયોજન કરવામાં આવ્યું હતું. જે અંતર્ગત મોરબીના બેઠા પુલ પાસે મચ્છુ નદીના કાંઠે જિલ્લા પ્રભારી મંત્રીશ્રી ત્રિકમભાઈ છાંગાની વિશેષ ઉપસ્થિતિમાં સઘન સ્વચ્છતા ઝુંબેશ હાથ ધરવામાં આવી હતી.
આ તકે પ્રભારી મંત્રીશ્રી સહિત ઉપસ્થિત પદાધિકારીઓ તથા વહીવટી તંત્રના અધિકારીશ્રીઓએ શ્રમદાન કરી નદી કાંઠા વિસ્તારની સફાઈ કરી હતી.
આ પ્રસંગે પ્રભારી મંત્રીશ્રીએ જણાવ્યું હતું કે, સ્વચ્છતા એ માત્ર એક દિવસની ઝુંબેશ નહીં પરંતુ આપણી દૈનિક જીવનશૈલીનો હિસ્સો બનવી જોઈએ. નદીઓ અને જાહેર સ્થળોને સ્વચ્છ રાખવા એ દરેક નાગરિકની નૈતિક ફરજ છે.
આ ઝુંબેશમાં મોરબી મેયરશ્રી ઉત્તમ સુરાણી, સાંસદશ્રી કેસરીદેવસિંહ ઝાલા, પોલીસ અધિક્ષકશ્રી મુકેશ પટેલ, કમિશનરશ્રી સંગીતા રૈયાણી, કોર્પોરેટરશ્રીઓ, સ્થાનિક અગ્રણીઓ, અધિકારીઓ, વિવિધ સંસ્થાઓના સ્વયંસેવકો અને સેવાભાવી નાગરિકો મોટી સંખ્યામાં જોડાયા હતા.
