વડીલોને ભોજન કરાવી, સુખ-દુઃખની વાતો કરી હૂંફ અને સધિયારો પૂરો પાડવામાં આવ્યો
મોરબી : યંગ ઇન્ડિયા ગ્રુપ તહેવારો અને વિશેષ દિવસોની અનોખી અને સેવામય ઉજવણી કરવા માટે મોરબીમાં ખૂબ જાણીતું છે. આ પરંપરાને જાળવી રાખીને મધર્સ ડે નિમિત્તે એક પ્રેરણાદાયક કાર્યક્રમનું આયોજન કરવામાં આવ્યું હતું. આજના આધુનિક સમયમાં જ્યારે સંબંધોનું મૂલ્ય ઘટી રહ્યું છે અને ઘણા વડીલો એકલતાનું જીવન જીવી રહ્યા છે, ત્યારે યંગ ઇન્ડિયા ગ્રુપે તેમની સાથે સમય વિતાવીને સમાજને એક સારો અને સકારાત્મક સંદેશ આપવાનો પ્રયાસ કર્યો છે.
મધર્સ ડેના આ ખાસ દિવસે યંગ ઇન્ડિયા ગ્રુપના સભ્યો મોરબીના વૃદ્ધાશ્રમ ખાતે પહોંચ્યા હતા. ત્યાં રહેતા તમામ વડીલો અને માતાઓને પ્રેમપૂર્વક પૌષ્ટિક ભોજન કરાવવામાં આવ્યું હતું. સંસ્થાના યુવાનો માત્ર ભોજન કરાવીને અટક્યા ન હતા, પરંતુ તેઓએ વડીલો સાથે લાંબો સમય વિતાવીને તેમના સુખ-દુઃખની વાતો સાંભળી હતી. જીવનની સંધ્યાએ પહોંચેલા આ વડીલોને આત્મીયતાની હૂંફ અને સધિયારો આપીને તેમના ચહેરા પર સ્મિત લાવવાનો એક અનોખો અને સરાહનીય પ્રયાસ કરવામાં આવ્યો હતો.
આ પ્રેરણાદાયક ઉજવણી અંગે વાત કરતા યંગ ઇન્ડિયા ગ્રુપના મેન્ટોર ડો. દેવેન રબારીએ જણાવ્યું હતું કે, “માતૃત્વનું ઋણ કોઈ ચૂકવી શકે તેમ નથી, પરંતુ જે માતાઓએ પોતાના જીવનનો અમૂલ્ય સમય બાળકો પાછળ ખર્ચી નાખ્યો હોય અને આજે પરિસ્થિતિવશ વૃદ્ધાશ્રમમાં રહેવા મજબૂર હોય, તેમને થોડો પ્રેમ અને સમય આપવો એ આપણી નૈતિક અને સામાજિક ફરજ છે. મધર્સ ડેની સાચી ઉજવણી એ જ છે કે આપણે આ વડીલોને એવો અહેસાસ કરાવીએ કે તેઓ એકલા નથી અને આખો સમાજ હજુ પણ તેમની સાથે ઊભો છે.”
વૃદ્ધાશ્રમના વડીલોએ પણ યંગ ઇન્ડિયા ગ્રુપના યુવાનો સાથે સમય પસાર કરીને ખૂબ જ આનંદ અને શાંતિની લાગણી અનુભવી હતી. યુવાનોએ વડીલોના અંતરના આશીર્વાદ પ્રાપ્ત કર્યા હતા અને ભવિષ્યમાં પણ આવા સેવાકીય કાર્યો અવિરત કરતા રહેવાનો સંકલ્પ કર્યો હતો. આ ઉજવણીએ એ બાબતને સાબિત કરી છે કે તહેવારોની ઉજવણી માત્ર દેખાડા પૂરતી સીમિત ન રાખતા, જરૂરિયાતમંદ લોકોના જીવનમાં ખુશીઓ લાવીને જ કરવી જોઈએ.
